Konsert: Gjermund Gjerdesmett og andre føykne fuglar

“Gjermund Gjerdesmett og andre føykne fuglar” er nykomponert musikk for barn med nynorske tekstar frå boka med same tittel, forfatta av Lisbeth Dreyer (2023). Dikta i Dreyer si bok er alle på rim, og fortel på artig og fagleg korrekt vis om ulike karakterar i dennorske fuglefaunaen. 

Konserten Gjermund Gjerdesmett og andre Føykne fuglar med bandet Kråkebollane.

Bandet Kråkebollane har igjen laga ny musikk for barn med nynorske tekstar - denne gongen henta frå den illustrerte diktboka Gjermund Gjerdesmett og andre Føykne fuglar. Det er Lisbeth Dreyer sine dikt og Per-Ragnar Nøkleby sine illustrasjonar som har gitt inspirasjon til musikken som hadde konsertpremiere ved festivalen «Jazz på Jølst» 12. oktober 2024. I 2025 har Kråkebollane spelt inn musikken i Fort Knox Studio ved Kato Ådland og  gir den ut på digitale strøymetenester i mars 2026. 

Dikta i Dreyer sine bøker er alle på rim, og fortel på artig og fagleg korrekt vis om ulike karakterar i den norske fuglefaunaen. Tekstane har invitert til musikalsk fabulering som har resultert i rytmiske og groovebaserte låtar, der alt frå Hip Hop og blues til musikk inspirert av musikalar og folkemusikk er representert. Musikken kan seiast å ha rot i jazz-sjangeren og inspirert av barns livsverd der både improvisasjon og handverk, leik og undring er gjennomgåande element.

Musikken er komponert, arrangert og blir framført av musikarane: Lena Skjerdal (vokal), Erik Håkon Halvorsen (tangentinstrument) og Knut Lothe (perkusjon) som til saman utgjer trioen Kråkebollane.  

Kråkebollane
Kråkebollane gav i 2021 ut albumet «Konrad Kråkebolle og andre Fjærefantar» der fleire av songane har vore spelelista og stadig vert spelt dagleg på NRK-Super Radio. Musikken til Kråkebollane har og vore formidla på festivalar som Dei Nynorske Festspela, Festspillene i Bergen, Marked for musikk og gjennom Den Kulturelle Skulesekken.